ទីក្រុងហ្សាការតា៖ រឿងអាស្រូវនៃការលួចស្តាប់ការសន្ទនាតាមទូរស័ព្ទរបស់ប្រធានាធិបតីឥណ្ឌូណេស៊ី លោក Prabowo Subianto កំពុងធ្វើឱ្យកក្រើកឆាកនយោបាយរបស់ប្រទេសនេះ។ អាជ្ញាធរកំពុងស៊ើបអង្កេតករណីនេះ ដែលអាចឈានដល់ការចោទប្រកាន់ពីបទក្បត់ជាតិ បន្ទាប់ពីមន្ត្រីជាន់ខ្ពស់ និងឧត្តមសេនីយ៍ជាច្រើនរូប រួមទាំងអតីតនាយកខុទ្ទកាល័យប្រធានាធិបតី និងជាអតីតអគ្គស្នងការនគរបាលជាតិ លោកឧត្តមសេនីយ៍ Listyo Sigit Prabowo ត្រូវបានចាប់ខ្លួន និងដកចេញពីតំណែងកាលពីថ្ងៃទី ៤ វិច្ឆិកា កន្លងទៅ។
យោងតាមការស៊ើបអង្កេតបឋម ប្រតិបត្តិការលួចស្តាប់ដោយខុសច្បាប់នេះមិនត្រឹមតែសំដៅលើរូបប្រធានាធិបតីប៉ុណ្ណោះទេ ប៉ុន្តែក៏បានកំណត់គោលដៅលើអ្នកសារព័ត៌មាន អ្នកនយោបាយ មន្ត្រីរដ្ឋាភិបាល សកម្មជនសង្គមស៊ីវិល និងអ្នកជំនួញជាច្រើនរូបទៀតផងដែរ។ ទន្ទឹមនឹងនេះ កងទ័ពរហូតដល់ជាង ២០,០០០ នាក់ ត្រូវបានដាក់ពង្រាយ និងត្រៀមប្រចាំការនៅរដ្ឋធានីហ្សាការតា ដើម្បីរក្សាសន្តិសុខ និងការពារស្ថិរភាពជាតិ ខណៈភាពតានតឹងនយោបាយកំពុងកើនឡើង។
វិបត្តិមួយនេះបានបង្ហាញឱ្យឃើញយ៉ាងច្បាស់ពីការកើនឡើងនៃភាពប្រេះឆាផ្ទៃក្នុងរវាងឥស្សរជននយោបាយ និងស្ថាប័នសន្តិសុខជាតិ ជាពិសេសរវាងលោក Prabowo និងកម្លាំងអ្នកគាំទ្ររបស់អតីតប្រធានាធិបតី លោក Joko Widodo (Jokowi)។ លោក Listyo ត្រូវបានគេស្គាល់យ៉ាងច្បាស់ថាជាមនុស្សជំនិត និងត្រូវបានតែងតាំងដោយលោក Jokowi ហេតុនេះការចាប់ខ្លួនលោកបានធ្វើឱ្យគេមើលឃើញពីភាពរង្គោះរង្គើនៃសម្ព័ន្ធភាពនយោបាយរវាងមេដឹកនាំទាំងពីរ បើទោះបីជាបច្ចុប្បន្ន កូនប្រុសរបស់លោក Jokowi កំពុងកាន់តំណែងជាអនុប្រធានាធិបតីក៏ដោយ។
ជារួម អស្ថិរភាពផ្ទៃក្នុងនៃប្រទេសដែលមានសេដ្ឋកិច្ចធំបំផុតនៅក្នុងតំបន់អាស៊ានមួយនេះ អាចបង្កជាហានិភ័យយ៉ាងធ្ងន់ធ្ងរដល់ទំនុកចិត្តរបស់វិនិយោគិនបរទេស។ ភាពតានតឹងរវាងស្ថាប័ននគរបាល និងយោធា ព្រមទាំងការបែកបាក់រវាងមេដឹកនាំកំពូល អាចធ្វើឱ្យរាំងស្ទះដល់ដំណើរការនៃការធ្វើសេចក្តីសម្រេចចិត្តថ្នាក់ជាតិសំខាន់ៗ ដែលអាចជះឥទ្ធិពលអវិជ្ជមានដល់ដំណើរការសេដ្ឋកិច្ចរបស់ឥណ្ឌូណេស៊ី៕